1233 Si aliquis posuerit in corde suo aliquem numerum, facies¹⁵⁷⁴ ei duplicare semel, et bis, et ter, et quotienscumque volueris, vel etiam triplicare, vel per aliquem numerum multiplicare, cum quibusdam aliis extractionibus et additationibus secundum quod inferius demonstrabimus, et volueris invenire summam in qua ipse ascenderit, retine tu in manu 1, et quicquid precipies ei, fac de ipsa unitate. 1234 Ut si preceperis ei quod duplicet vel triplicet, tu duplica vel triplica ipsam unitatem; et cum hoc aliquotiens ambo feceritis pariter, precipe ut ipse addat summe vel extrahat a summa numerum quem ipse in corde suo posuit¹⁵⁷⁵ semel, vel bis, vel quotienscumque volueris; et tu fac similiter de unitate tua. 1235 Et tunc precipias ei ut dividat totam summam quam habuerit per numerum quem in corde suo posuit, et tunc scias quod ipse habet tantum quantum tu habes in manu tua.

Verbi gratia: ponatur quod ipse cogitet 6, quem si duplicaveris erunt 12, et tu ex duplicata unitate habebis 2. 1236 Unde si ipse 12 bis duplicaverit habebit 48, et tu si binarium quem habes ex duplicato 1 bis duplicaveris, habebis 8; et si ipse suum 48 triplicaverit, habebit 144, et si tu triplicaveris 8, habebis 24; et sic possemus procedere in infinito, duplicando, vel triplicando, vel quadruplicando. 1237 Super que 144 si addiderit ter numerum quem ipse in corde suo posuit, scilicet ter 6, habebit 162, et si tu super 24 addideris ter ipsam unitatem habebis 27. Et tunc si ipse diviserit summam, videlicet 162, per numerum quem in corde suo posuit, scilicet per 6, habebit 27, sicut tu habes. Unde si dixeris ei quod habeat 27, videberis aliquod dixisse miraculum.

1238 Ex hac itaque regula aliqua quedam procedit, que non minus miranda est. Videlicet cum volueris ut aliquis inveniat numerum quem tu in corde tuo posueris sine aliqua interrogatione, debes ei dicere ut accipiat a quocumque velit homine aliquem numerum. Et tu tene in manu tua 1, et precipias ei ut duplicet numerum quem accepit, vel triplicet, vel per alium numerum multiplicet, vel etiam dividat, 1239 et super summam addat vel extrahat numerum quem ab ipso acceperit; et tu semper fac de unitate tua illud idem quod sibi preceperis, et hoc fiat donec ex ipsa unitate procreaveris numerum quem in corde posuisti; et tunc dicas ei ut dividat numerum quem habet per numerum quem accepit, et quod ex divisione pervenerit erit numerus quem in corde posuisti.