164 De arca prestita plena frumento

Quidam recepit mutuo quandam arcam plenam frumento, que habuit in singulis lateribus, videlicet in latitudine, longitudine²⁵¹ et altitudine palmos 16. Accidit nempe quod ipsa arca fuerit igne combusta, sic quod non posset frumentum cum ipsa arca reddere; qui cum conveniretur ut redderet frumentum suo prestatori, ait: habeo arcam que habet in singulis lateribus palmos 4; tolle cum ea tuum frumentum. Queritur quot arcas frumenti ei reddere debeat. 165 Multiplicabis itaque latitudinem maioris arce per longitudinem ipsius, videlicet 16 per 16; erunt 256, que multiplica per altitudinem, videlicet per 16; erunt 4096, que divide per 64 que exiit ex multiplicatione laterum minoris arce, videlicet de 4 in 4, que in 4: exibunt arce 64. Vel aliter: divide latus maioris arce per latus minoris, videlicet 16 per 4; exibunt 4, que cubica: erunt similiter arce 64, ut prediximus.

166 Si autem aliqua prescriptarum arcarum inequalia haberet latera priori regule non obstaret; quia semper multiplicanda est latitudo per longitudinem et altitudinem maioris arce, et debes dividere ipsam summam per latitudinem et longitudinem et altitudinem minoris.