288 Explicit de inventione radicum cubicarum. Incipit de multiplicatione earundem inter se

Si vis multiplicare radicem cubicam de 40 per radicem cubicam de 60, multiplica 40 per 60, erunt 2400; quorum radix cubica est id quod queris. Et si vis 5 multiplicare⁴³⁷ per radicem cubicam de 90, cubica 5, erunt 125. Ergo vis multiplicare radicem cubicam de 125 per radicem cubicam de 90. Quare multiplicabis 125 per 90, et eius quod provenerit radix cubica est illud quod queris.

289 Et si vis multiplicare duas cubicas radices de 20 per tres radices cubicas de 40, redige eas ad radicem cubicam unius numeri sic: pro duabus radicibus de 20 cubica⁴³⁸ 2⁴³⁹; erunt 8, que multiplica per 20: erunt 160, quorum radix cubica equatur duabus⁴⁴⁰ radicibus de 20. Similiter pro tribus radicibus de 40 cubica 3; erunt 27, que multiplica per 40: erunt 1080, quorum radix cubica habetur pro tribus radicibus de 40. 290 Multiplica ergo 160 per 1080, et eius quod provenerit radix cubica erit illud quod queris. Item si vis multiplicare radicem cubicam de 20 per⁴⁴¹ aliquid unde proveniat aliquis numerus datus, ut dicamus 10, cubica 10; erunt 1000, que divide per 20: exibunt 50, quorum radix cubica est id quod queris.

291 Et si vis invenire duas radices cubicas numerorum non cuborum que insimul multiplicate faciant numerum ratiocinatum, cubica unum numerum qualem vis, et invenias duos numeros qui insimul multiplicati faciant ipsum cubum numerum. Cubice autem radices ipsorum duorum numerorum erunt quesita. 292 Verbi gratia: cubicentur 6; erunt 216, et invenias duos numeros qui insimul multiplicati faciat 216, eruntque 9 et 24, quorum radices cubice sunt quesita. Aliter: adiaceant duo numeri quadrati quales vis, sintque 4 et 9, et multiplica unumquemque ipsorum per radicem alterius: exibunt 12 et 18, quorum radices insimul multiplicate faciunt radicem cubi numeri, ut querebatur.