1260 Quidam dedit unum denarium ad usuram, ita quod in quinque annis debebat duplum ipsius denarii recipere, et in aliis quinque debebat duplum habere duorum illorum denariorum; et sic semper de 5 in 5 annis duplicabatur capitale ipsius et usura. Queritur quot denarios ex ipso denario habere debeat in 100 annis.

1261 Divide ipsos annos 100 per 5: exibunt 20; ergo vigiesies duplicatur denarius ille. Unde 20 punctorum scacherii gerit similitudinem; quare si duplicaverimus ipsum denarium vigesies, habebimus summam in qua ipse denarius ascenderit in 100 annis. Vel aliter: duplica ipsum denarium: erunt 2, in quo numero ipse denarius ascendit in primo quinquennio. Que 2 iterum multiplica in se: erunt 4, in quo numero ipse denarius ascendit in secundo quinquennio. 1262 Que 4 iterum multiplica in se: erunt 16, qui numerus est summa in qua ascendit ille denarius in quarto quinquennio. Que 16 duplica: erunt 32 pro summa quinti quinquennii. Que 32 in se multiplica: erunt 1024 pro summa decimi quinquennii. Que 1024 in se multiplica: reddunt denarios 1048576 pro summa vigesimi quinquennii, scilicet annorum ipsorum 100, qui sunt libre 4369¹⁵⁸⁶ et denarii 16.

1263 Eadem regula est de homine qui vendidit 20 paria pellium, ex primo quorum debebat habere 1 denarium, ex secundo 2, ex tertio 4, et sic semper duplicando usque ad ultimum par; quorum summa¹⁵⁸⁷ est denarius 1 minus de predicta summa.