167 De cisterna plena aqua, in qua eicitur lapis tetragonus²⁵²

Est cisterna plena aqua que tenet bariles 1000, et habet in latitudinem pedes 20 et in longitudinem pedes 24 et in altitudinem pedes 30. Queritur, si eiciatur in eam lapis quadratus, habens in singulis lateribus pedes 6, quanta aqua inde exierit. Multiplicabis itaque cisterne latitudinem per longitudinem, scilicet²⁵³ 20 per 24, erunt 480, que multiplica per altitudinem, videlicet per 30: erunt pro area totius cisterne pedes quadrati 14400, quos serva. 168 Et multiplica in unum latitudinem et longitudinem et altitudinem lapidis, scilicet 6 per 6, que per 6: erunt pedes²⁵⁴ 216 quadrati pro area ipsius lapidis. Quare proportionaliter est sicut 216 ad 14400 ita bariles evacuationis ad bariles 1000. Quare multiplica 216 per 1000; erunt 216000, que divide per 14400: exibunt 15, et tot bariles aque exibunt de cisterna pro ipso lapide.