<Prologus>

1 ¹ Liber² Abbaci compositus a Leonardo filiorum³ Bonacii Pisano⁴ in anno⁵ M^o CC^o II^o et correctus ab eodem⁶

^[1]

2 ⁷ Scripsistis mihi domine mi et⁸ magister Michael Scotte, summe philosophe, ut librum de numero quem dudum composui vobis transcriberem; unde vestre obsecundans postulationi, ipsum⁹ subtiliori perscrutans indagine, ad vestrum honorem et aliorum multorum utilitatem correxi. In cuius correctione quedam necessaria addidi et quedam superflua resecavi. In quo plenam numerorum doctrinam edidi iuxta modum Indorum, quem modum in ipsa scientia prestantiorem¹⁰ elegi.

3 Et quia¹¹ arismetrica et geometrica¹² scientia sunt connexe et suffragatorie sibi ad invicem, non potest de numero plena tradi doctrina nisi interserantur geometrica quedam vel ad geometriam spectantia, que hic tantum iuxta modum numeri operantur; qui modus est sumptus ex multis probationibus et demonstrationibus que figuris geometricis fiunt. 4 Verum in alio libro quem de pratica geometrie composui, ea que ad geometriam pertinent et alia plura¹³ copiosius¹⁴ explicavi, singula¹⁵ figuris et probationibus¹⁶ geometricis demonstrando.

5 ^[2] Sane hic liber magis ad theoricam spectat quam¹⁷ ad praticam. Unde qui per eum huius scientie praticam bene scire voluerint, oportet eos continuo¹⁸ usu et exercitio diuturno in eius praticis perstudere; quod scientia per praticam versa in habitum, memoria et intellectus¹⁹ adeo concordent cum manibus et figuris, quod quasi uno impulsu et anelitu in uno et eodem instanti circa idem per omnia naturaliter consonent; et tunc cum fuerit²⁰ discipulus habitudinem consecutus, gradatim poterit ad perfectionem huius²¹ facile pervenire. 6 Et ut facilior pateret²² doctrina, hunc libum per XV distinxi capitula, ut quicquid de his lector voluerit²³ possit levius invenire. Porro si in hoc opere reperitur insufficientia vel defectus, illud emendationi vestre²⁴ subicio.

7 ²⁵ Cum genitor meus a patria publicus scriba in duana Bugee pro pisanis mercatoribus ad eam²⁶ confluentibus constitutus preesset, me in pueritia mea ad se venire faciens, inspecta utilitate et commoditate futura, ibi me studio abbaci per aliquot dies stare voluit et doceri. 8 Ubi ex mirabili magisterio in arte per novem figuras Indorum introductus, scientia artis in tantum mihi pre ceteris placuit et intellexi ad illam, quod quicquid studebatur ex ea apud Egyptum, Syriam, Greciam, Siciliam et Provinciam cum suis variis modis, ad que loca negotiationis causa²⁷ postea²⁸ peragravi, per multum studium et disputationis didici conflictum. 9 Sed hoc totum etiam et²⁹ algorismum atque arcus³⁰ Pictagore quasi errorem computavi respectu modi Indorum. Quare amplectens strictius ipsum modum Indorum et³¹ attentius studens in eo, ex proprio sensu quedam addens et quedam etiam ex subtilitatibus Euclidis geometrice artis apponens, summam huius libri quam intelligibilius potui in quindecim capitulis distinctam³² componere laboravi, fere omnia que inserui certa probatione ostendens, ut ex tam perfecto pre ceteris modo hanc scientiam appetentes instruantur, et gens latina de cetero, sicut hactenus absque illa minime inveniatur³³. 10 Si quid forte minus aut plus iusto vel necessario intermisi mihi deprecor indulgeatur, cum nemo sit qui³⁴ vitio careat et in omnibus undique sit circumspectus.